政情：舊照片感性的梁班子
特首梁振英（CY）新班子上任剛滿月，尋日就出咗本叫做《齊心一意為市民》小冊子，從軟性角度介紹新班子。其中政務司司長林鄭月娥原來有「好打得」嘅感性；近日忙於為國民教育解畫嘅教育局局長吳克儉，連頭髮濃密嘅年輕照亦首度公諸於世；律政司司長袁國強為咗工作，就算食晏食足一年叉燒飯都唔厭。估唔到梁班子顯示齊心團隊形象外，仲將人性化、有血有肉嘅一面展露於市民眼前。
《齊心一意為市民》小冊子尋日喺特首辦網頁曝光，全本小冊子有近五十頁，由CY以「齊心」為題寫序，三司十二局連同五名要中央任命嘅官員粉墨登場接受訪問，大談自己嘅「小故事」同「小秘密」。打頭炮係「好打得」嘅林鄭，大爆林鄭曾試過睇文件睇到落淚，話說當時有入境事務助理員喺持槍打劫案協助捉賊中槍身亡，呢份文件送到林鄭手中時，佢不禁落淚，並批准當時保安局建議由庫房撥出特惠金表揚呢位員工。
袁國強食一年叉燒飯唔厭
林鄭有「好打得」嘅感性，袁國強就係容易滿足嘅「工作狂」，曾經食晏食足一年叉燒飯都唔厭，一旦做嘢就由清晨四點到晚上八、九點，咪以為佢淨係識工作，其實佢都有輕鬆嘅一面，放工後最鍾意返屋企睇電視同笑片。新班子嘅一眾局長亦係有血有肉，原來環境局局長黃錦星已經近十年冇打呔返工，早年佢喺建築事務所工作，連老闆同事都被佢感染，衣着輕便又可校細啲冷氣，當時已有同事戲稱佢做「環境局局長」。
本身係人力資源專家嘅吳克儉，喺小冊子自行拆解「一加一」呢條數學問題嘅大智慧，即兩個人馬虎做事，一加一最多得到二，不合作嘅話只得一點一或更少，倘有目標共同奮發，一加一會係十一或更多回報。公務員事務局局長鄧國威要管理十六萬公務員殊不容易，其實佢自己另有一番豁達人生哲學︰「做事盡咗力，即使結果未如理想，心情都要放開，保持心境開朗最重要。」唔知佢呢番感受係咪要為近期諸事不順嘅梁班子打氣呢？