中環出更：劉陳小寶遊沖繩變「獵物」
富有陽光同海洋氣息嘅日本沖繩，一年四季都係旅遊好季節，時值暑假旺季，機位更係逼爆。前保良局主席劉陳小寶（Angel）都遊沖繩抖暑，月前早已預訂機票，點知秘書擺烏龍，臨飛前竟然放棄其中兩個機位，險令旅程泡湯。
因為一個誤會，Angel差啲無緣遊沖繩，幸得老友相助，一家五口最後開心登機。首次遊沖繩，Angel做足防曬，盡情享受陽光與海灘，又試玩水上電單車，刺激到極。嚟到沖繩，點都要參觀世界聞名嘅「美麗海水族館」，Angel不愧係「鯊魚女」，鯊魚見到佢，乖乖游近水族箱玻璃，好似想錫佢一啖咁。佢又跳入一個巨型鯊魚顎骨標本內扮「獵物」，認真搞鬼。
沖繩海產豐富，但最滋味嘅反而係新鮮和牛。Angel發現，沖繩嘅和牛味道極之鮮嫩，仲比東京售價平三分之二，於是餐餐勁擦和牛，食齊鐵板燒同韓燒，大飽口福。Angel笑言增磅不少，返香港後要狂踩單車減肥喇。