港式俚語有一句「放飛機」，意思係點解嘅呢？舉一個例子，你約靚女飲茶，對方臨時失約，靚女就係放飛機，而你係被放飛機。放飛機引伸開去嘅意思就係，本來有合理期望，忽然變得好失望。
靚女放人飛機好普遍嘅啫，鬼叫你甩皮甩骨又無財無勢咩，大家有冇聽過連搭飛機都會被放飛機？
件事係咁嘅，強颱風韋森特不但導致香港掛出十三年以來第一個十號風球，更加令到一間叫做「香港航空」嘅香港航空公司嚴重延誤。所謂延誤，意思就係話大批預約搭飛機嘅乘客始終無法搭飛機，本來有合理期望，忽然變得好失望，乘客集體被放飛機。
航班延誤情況有幾嚴重呢？滯留機場嘅乘客動不動都幾百人，港航部分櫃位只得一至兩名職員當值。有員工透露，港航過去幾日明知冇辦法為乘客提供機位，仍然同乘客辦理登機手續。有乘客由早上七點等到晚上十一點先至能夠登機。
你知啦，人類嘅忍耐力係有限o架，滯留機場癡癡地等好容易群起鼓譟。終於有人忍唔住動粗，一名火爆男乘客一巴掌摑向一名女地勤，對方當堂梨花帶雨淚如泉湧。另外又有一名索取毛氈不遂嘅女乘客，向一名男地勤怒潑蒸餾水，並且破口大罵。動粗事件搞到場面十分混亂，警方出動機場特警荷槍實彈維持秩序。
唔好以為只有乘客被放飛機，其實做咗代罪羔羊出氣袋嘅港航員工一樣合理期望變失望。不少做到裙拉褲甩嘅員工，已經日以繼夜連續工作三、四十小時，佢哋曾經要求公司取消未來三日航班以疏導乘客，哈，呢一間不知所謂嘅搶錢公司居然拒絕喎。換言之，你有你忙到甩轆，佢有佢繼續收客，員工想放工休息嘅合理期望落空嘞，咁咪即係被放飛機囉。
都係嗰句啦，人類嘅忍耐力係有限o架。有開工冇收工嘅員工怒不可遏，機組及地勤人員爆發辭職潮，約半數即最少六名地勤服務主任已經劈炮，亦有不少前線地勤人員相繼請病假，高峰期二十四人集體告假。最新情況發展係，兩日內未解決問題的話，罷工！
計功夫茶話齋，香港航空根本冇資格掛住「香港」呢一個招牌。十號風球雖然破壞力驚人，之但係都唔使亂成咁啩。既然疏導乘客慢如蝸牛咁失敗，好心就暫停收新客啦，賺少兩個臭錢唔使死o架。港航家陣嘅做法，好比浴缸滿水都唔閂水喉，唔水浸就有鬼啦！
為免罷工連累更多乘客受害，不如咁啦，負責發牌嘅特區政府勒令港航閂水喉，否則吊銷牌照，唔好畀管理不善又貪婪可鄙嘅香港航空令到香港蒙羞吖嘛！