政情：心蓮心建成年院童宿舍
慈善組織「心蓮心」發起人之一嘅何彭慧嫻（Patti），為協助弱勢青年有個棲身之所，正度橋籌款二百萬元興建宿舍。身為虔誠基督徒嘅Patti，早前聽聞黃大仙播道兒童之家嘅院童，因滿十八歲後要離院自力更生，卻因為付不起高昂租金，苦無棲身之所。Patti話，唔少院童初次投身社會工作，收入有限，往往連「劏房」都租唔起，要三更半夜喊住打畀院長求救，真係聽見都心噏。
Patti於是同院長商量，認為可在原來宿舍旁邊加建一幢獨立屋，提供約廿八個宿位，等呢班成年院童有容身之所，有關工程已獲當局批准，只欠資金。Patti決定拍心口支持，計劃年底搞個大型籌款晚會，邀請名人朋友鼎力支持。Patti七月底會飛美國，出席妹妹嫁女嘅喜宴。佢又透露，一個瑞士護膚品牌邀請佢設計藝術品，正構思一條華貴鑽石頸鏈，認真多才多藝。