政情：事旦男抓提名反應冷清
有意參加立法會香港島直選嘅「事旦男」何家泰，尋日趁反國民教育遊行夠多人，喺銅鑼灣至灣仔嘅一段遊行路線擺街站，希望爭取足夠提名票入閘，可惜反對國民教育嘅市民都唔太得閒理佢，反應甚為冷淡。事旦男尋日除下面罩出場，又多次將街站移位，由下午兩點半鐘開始，先喺糖街擺檔，無幾耐又移咗去灣仔，期間有一個女助手揮舞字牌，呼籲啲市民多多支持，爭取簽名提名。
問到選舉嘅嘢，事旦男就好堅定話，目標仍然係狙擊民主黨喎，而且提名嗰方面已得到唔少親戚支持o架喇。
不過，我哋尋日睇咗一段時間，似乎唔係太多市民行埋去簽名，佢最終係咪真係可以攞夠提名，睇嚟仍須努力。