政情：陳茂波縮短旅程等做官
一直盛傳會出任財政司副司長嘅陳茂波（Paul），因為政府重組通過唔到，加上放棄連任立法會會計界議席，隨時頓變成「雙失」，點知佢早前又好似食咗「誠實豆沙包」咁忽然表明心迹，話做發展局局長無經驗都唔係問題，變相證實佢會補上做發展局局長嘅傳聞。阿Paul尋日就自嘲做咗四年議員，估唔到咁易就畀人「chok」到爆料，自嘆認真水皮，仲索性自爆話會縮短陪囡囡去美國開學嘅行程，睇嚟呢個局長真係坐定粒六喇。
雖然阿Paul已經差唔多講到出口會獲邀加入問責班子，但一切仍未有正式公布，至於幾時先會獲任命，阿Paul就點都唔肯講。除咗要陪囡囡赴美開學外，阿Paul尋日仲為自己嘅立法會接班人林智遠（Nelson）嘅造勢大會站台，力抗泛民主派參選人梁繼昌。Nelson嘅造勢大會有成二百人出席，唔少唐營人士都係坐上客，雖則好有建制派大和解意味，但阿Paul同Nelson都異口同聲話，佢哋唔似對手咁有鐵票喎，總之就講到選舉好激烈。