每逢政壇發生醜聞，民主黨主席何俊仁（鐵頭仁）例必企喺道德高地批判，以撈取政治油水，自從近日鐵頭仁被揭發過去四年一直無向立法會秘書處申報持有一間公司嘅股份及董事職位，違反立法會申報利益原則，但佢對自己單醜聞就隻字不提，只係靜雞雞補回申報。有心水清嘅市民早前仲發現，鐵頭仁每年都會以董事身份向公司註冊處申報資料，又為該公司持有單位做按揭套現，質疑佢係有心隱瞞事件。由於鐵頭仁連日態度龜縮，一班網民發起狙擊鐵頭仁漏報利益行動，逼佢公開交代事件。
鐵頭仁尋日原定獲邀出席屯門一個地區活動，有當區市民一早喺網上討論區揚言會到場質問佢漏報事件，令成班網民擔定櫈仔等睇戲，點知鐵頭仁竟然全程「潛水」無露面。正當大家以為鐵頭仁唔出席活動係想避開市民狙擊，但原來佢係去咗維園參加反國民教育遊行抽水博曝光，仲話對黨友狄志遠撐國民教育嘅言論表示驚訝同遺憾喎。已報名參選超級區議會議席嘅名單仲有涂謹申、劉江華、李慧琼、陳婉嫻同白韻琹。