政情：高官教路三招剪布

立法會主席曾鈺成喺議員出缺安排拉布戰中，利用《議事規則》賦予嘅酌情權剪布，事後被指濫權同曲解規則，而且呢招只能喺拉布拉咗好一輪之後使用，到嗰陣時建制派同眾高官早已五勞七傷。所謂食髓知味，激進泛民喺來屆立會必定重施故技，再次利用拉布對付佢哋反對嘅法例同議案，官府因此亦早作準備，廣集專家鑽研《議事規則》，睇吓仲有咩方法剪布。

有高官分析，泛民拉布大可分為三招，一為提出上千條修訂或動議，淨係表決都浪費數十多個小時，破解招數係收緊主席對無聊瑣碎議案嘅執法準則，但由於前有主席鬆手審批之例，後人好難無故改變。拉布第二招係喺全體委員會審議階段不斷輪流發言，破解招數係修改《議事規則》，限制議員就同一議案嘅發言次數，但用呢招嘅難題係要修改《議事規則》，喺分組點票下難以獲得泛民支持。

僅會議開始及表決點人數

拉布最後一招，係趁部分建制派體力不支，離席小休之際，要求響鐘點算出席人數博流會。高官指出，其實規限法定人數嘅《議事規則》第十七條，除咗訂明喺表決時要有一半議員在席外，並無講明會議嘅所有時間都要計算法定人數，所以主席大可將有關條文，重新解讀為只有喺召開會議一刻先要計數，會議開始後大家就可暫時退席抖抖，等表決時先重返會議廳。

該名高官仲建議由內務委員會通過決議提請主席「釋法」，以免主席自行「釋法」再受批評。雖然呢招破解唔到泛民狂提修訂同輪流發言，但已令拉布殺傷力大減，至少建制派唔使再受不斷響鐘之苦，搞到發夢都聽到「叮噹、叮噹」鐘聲之陰霾。