中環出更：仁愛堂率學生勇闖珠峰
登上世界最高嘅珠穆朗瑪峰，係唔少探險家嘅目標。仁愛堂前日率領二十多個本港中學及大學生勇闖珠峰，宣揚環保訊息，為期十六天，期間會記錄低整個考察過程，作為日後學術研究嘅真實數據。當日仁愛堂主席黃達東（Dennis）同一班兄弟姊妹晨早到機場送機兼打氣，前主席蔡黃玲玲千金蔡珍妮（Elina）都隨團出發。
服紅景天抗高山症
要策劃珠峰之旅殊不容易，Dennis話要同藏區多個相關部門溝通，基於安全問題，好多地方都唔係開放畀公眾，所以同學獲安排與西藏登山學校合作考察及交流，機會難逢。總理陳婉珊（Clara）擔任團長，咪睇佢弱質纖纖，原來已經多次出征西藏，試過上到近海拔五千米，今次信心十足，仲有備而來，帶定中藥紅景天對抗高山效應。
Clara話，呢個旅程唔係玩咁簡單，仲背負住重要嘅使命，團員喺山上每日都要量度血氧量、血壓同情緒變化，希望同學更了解自己體能上嘅極限，又會到冰川做水質測試，作為環保研究之用。
對於囡囡遠行，蔡黃玲玲拍晒心口話唔擔心，事關Elina自小就四圍飛去上暑期學校，煉成堅強獨立嘅性格。Elina就笑言，今次最緊要帶齊相機同腳架，為旅程留下美麗回憶。為咗鍛煉強健體格，佢同媽媽經常孖住跑步，難怪二人都咁健美，似足兩姊妹。隨團嘅仲有前副主席張華強一家三口，佢哋上次已經舉家去過北極，今次自然駕輕就熟。
卓妮