長壽之都雖可喜 安老無計究可悲

呢，日本厚生勞動省日前公布，日本女性平均壽命縮減至八十五點九歲，而香港就有八十六點七歲，日本失去保持咗二十六年嘅全球最長壽女性地方寶座；加上香港男性早就係全球最長壽，港男港女齊齊摘冠，成為名副其實嘅長壽之都，真係相當難得o架！

古人話，長壽是福。喺正常嘅情況下，人人都希望自己壽比南山，最好就好似傳說中嘅彭祖活到八百歲添。可惜，今時唔同往日，香港地生活艱難，安老政策殘缺不全，退休保障嚴重不足，老人貧窮問題不斷惡化，幾多人臨老唔過得世，長壽究竟係咪一種福氣，真係好難講。即係咁，對於生活無憂無慮、身體無病無痛、身邊有人照顧嘅老人家，梗係愈長壽愈好喇；但對於嗰啲老無所依、老無所養嘅老人家咯喎，長壽唔單止唔係福氣，甚至可能係一種折磨添。

嗱，功夫茶唔係危言聳聽o架。香港長者貧窮率已經超過三成三，即係每三個長者就有一個貧窮，人數接近三十萬咁多。唔少長者七八十歲仲要為口奔馳，唔少長者靠微薄嘅生果金過日，唔少長者靠執紙皮汽水罐幫補生計，對於香港呢個所謂國際大都會嚟講，簡直丟架。

本來呢，香港屬於富裕地區，財力雄厚，安老應該唔成問題，弊在港府又孤寒又唔肯承擔，一直漠視老人貧窮問題，搞到基層長者叫天不應，叫地不靈，有乜辦法唔淒涼吖。最離譜嘅係，政府資助嘅安老宿位僧多粥少，幾多老人家苦苦等候，仲未等到已經含恨離世。正如有人話齋，香港地生不起、住不起、病不起、老不起、亦死不起，一啲都冇誇張。

所以話，長壽真係未必是福o架。不可不知，隨着港人愈來愈長命，社會愈來愈老化，老人問題將會愈來愈嚴重，如果當局仲唔快啲諗辦法應付，香港隨時由長壽之都變成虐老之都。梁振英政府將安老視為施政嘅重中之重，一上場就決定增加生果金，方向無疑正確，不過咁，淨係增加生果金係遠遠唔夠嘅，要真正解決老人貧窮問題，關鍵係要制訂長遠及全面嘅安老政策。「老吾老以及人之老」吖嘛，尊老敬老，就算動用多啲資源，都冇人會反對嘅，何況香港完全負擔得起。

總而言之，長壽之都雖可喜，安老無計究可悲。如果老人家唔可以快樂地生活，有尊嚴地生活，就算點樣長壽都唔值得高興喇，係咪！