政情：盛女麥美娟「情傾」標準工時
做咗十九年區議員嘅工聯會立法會新界西參選人麥美娟（Alice），現年四十一歲仍小姑獨處，早排特首梁振英（CY）同佢落區時就答應，介紹五個男仔畀佢識，但至今都未有下文。Alice尋日笑言，CY唔記得冇所謂，只要佢記得研究為標準工時立法就得喇，估唔到Alice為咗勝選寧願犧牲個人幸福。不過，佢尋日就特別強調，雖然自己已經四張嘢，但仍然保養得宜咁話，係咁Keep住啱o架喇。
Alice今次選舉揀咗紅、白、藍三色做競選顏色，白同藍代表藍領同白領，凸顯佢哋除咗基層工友外，亦會為白領階層打工仔服務喎。至於紅色，原來係代表辣椒，寓意佢作風夠辣，風格夠晒硬淨。咁複雜，又同投票箱撞晒色，佢班支持者明唔明o架？
參選新界西嘅名單仲有譚耀宗、陳恒鑌、梁志祥、郭家麒、麥業成、田北辰、梁耀忠、李永達、陳樹英、陳強、陳偉業、李卓人、何君堯、曾健成、陳一華。