政情：黃之鋒自爆父母係公文袋人？
教育局推行嘅國民教育科被全城鬧爆「洗腦」，一班中學生就走上街頭搞抗爭，其中學民思潮召集人黃之鋒更以超卓辯才見稱，雖然年紀小小，但係面對質詢時對答如流，論政質素比唔少議員仲好。由於佢無政黨背景，好多人都覺得佢挺身而出係出於真誠，無政治動機。不過，尋晚網上流傳一段短片，就係黃之鋒接受網台主持人訪問，問到佢父母係咩政治背景時，佢就爆咗一句：「佢哋唔係社民連，佢哋係公民黨嘅。」即時令網民群起而攻之，質疑黃之鋒係咪公文袋嘅人。
我哋即刻打畀當事人問個清楚，點知黃之鋒話佢父母唔係公民黨員，更從來無加入過任何政黨，連平時七一遊行、六四集會都係稀客，久唔久先至去一次。佢自己更加無政黨背景，將來都唔會加入政黨。既然佢講得咁肯定，唔通當時佢喺網台所講嗰句「佢哋係公民黨嘅」，係指父母係公民黨嘅支持者？但黃之鋒又唔肯認父母係咪公民黨支持者。究竟係佢口快快講完唔認數吖？定係佢唔知自己噏咗啲乜呢？