政情：民協淆底 新西九東冚旗
近幾屆立法會選舉民協都好大想頭，希望突破現時只得黨員馮檢基（KK）嘅一個九龍西議席，可惜事與願違。嚟緊九月選舉該黨將變陣，改派KK轉戰超級區議會議席外，亦會殺入九龍東同新界西，連同老巢九龍西，希望打破一席嘅宿命。不過，民協尋日突然宣布退選九龍東同新界西，全力留守九龍西及力保超級議席，此舉最大得益者將會係民主黨（白鴿黨）同公民黨（公文袋）。究竟係KK淆底臨陣退縮吖？定係民協都有份參與傳聞中白鴿黨同公文袋嘅秘密協議呢？
民協尋日臨時臨急開記者會宣布，KK同副主席譚國僑繼續領軍出選超級議席及九龍西直選，但參選九龍東嘅許錦成及新界西嘅廖成利（老虎仔）就會退選，分別改為排喺KK同譚國僑名單之後。KK解釋，因為留意到泛民主派選情嚴峻，為咗力保泛民喺立法會有廿四席嘅否決權，所以決定變陣，仲話「生存要生存得有意義，如果冇廿四席泛民就等於廢咗，立法會亦都係廢咗，民協願意做呢隻火鳳凰。」
對選情未必有幫助
KK講到咁大義凜然，但其中一個原因就係驚輸。KK棄選九龍西而轉戰超級議席已經好冒險，譚國僑又唔爭氣，支持度一直都偏低，搞到老虎仔要回巢幫譚國僑抬轎。不過，就算變陣對佢哋嘅選情都未必有幫助，皆因老虎仔已經係「舊電池」，真係唔知幫得幾多。
至於許錦成亦對KK選超級議席冇乜幫助，皆因佢知名度低，相信呢個安排係畀佢掛吓名，比起唔選冇咁肉酸，亦可幫輕吓KK嘅選舉工程。
今次民協變陣最大嘅得益者莫過於出選九龍東同新界西嘅泛民黨派，事關KK話，民協喺地區攞到萬零票一啲都唔奇，仲話好願意喺九龍東同新界西為社民連同白鴿黨助選添。大家唔好唔記得，公文袋講明唔玩超級議席，又堅拒支持黨員司馬文參選，除咗令白鴿黨得益外，相信同樣受益嘅仲有民協KK。分析完各方利益，總結係三黨互相得益，大家話世事邊有咁蹺吖，話當中冇搞「地下情」，睇怕冇乜人會相信囉。