中環出更：沈祖堯以為細女「鬼上身」
今年九月，新舊學制兩批學生將同時入大學讀書，雖然中大校長沈祖堯嘅工作量比以前增加一倍，但佢尋日都願意抽空同家長分享栽培子女嘅心得。同太太育有兩個乖女嘅沈校長話，細女幾年前突然之間成日發脾氣同鬧屋企人，搞到爹哋媽咪一頭霧水之餘，佢仲走去問老婆細女係咪「鬼上身」添。沈校長後來睇書先知道原來每個小朋友都會經歷反叛期，又話呢段時間係佢哋尋找自我嘅必經階段，父母應該多啲容忍佢哋。
睇fb掌握兩女舉動
沈校長大女詠恩去年拔尖入讀中大醫科，佢話雖然囡囡讀得有啲辛苦，但成日都會問到「醫生爸爸」口啞啞，令佢覺得囡囡讀得相當投入。至於細女仲有兩年先考中學文憑試，又話每個小朋友都有讀書壓力，唔覺得自己個女讀得特別辛苦。
沈校長提醒家長要做子女嘅好朋友，而唔係做佢哋嘅敵人，所以佢平時會同兩個女喺facebook（fb）溝通同互寫肉麻說話，又大讚fb令佢清楚掌握兩個女嘅一舉一動，同朋友出街食飯食乜都知喎。