中環出更：Rick Chin教扮靚 浙青蜂擁捧場
近年轉型創辦美容護膚生意嘅星級化妝師Rick Chin，前晚現身灣仔會所餐廳「浙江軒」，為浙江省同鄉會聯合會（浙聯）青委一班俊男美女講授扮靚心得，吸引逾百名貪靚男女捧場。原來正打造美容王國嘅阿Rick都係浙江人，佢嘅合夥人亦係浙江二代詹氏姊妺花，即香港台州同鄉會名譽會長詹榮良嘅寶貝女兒，當日詹家大姊嘉莉及老二嘉儀都喺度。眾人顧不得美食當前，爭相圍住阿Rick討教護膚秘笈，氣氛熱鬧過趁墟。
阿Rick多年來化過嘅天王巨星臉容多不勝數，由梅艷芳、張國榮到張栢芝，粒粒巨星。不過，近年重新思索人生方向，喺修讀護膚及醫學美容課程後，佢兩年前毅然創辦「體．研究所」（everybody labo），與世界各地知名研究所合作，以實惠價錢將無污染嘅護膚品推介畀城中姊妹，佢形容係一盤良心生意，推出後備受好評，現時旗下已有九個護膚品牌及美容院。
龔嬿打泰拳瘦身
阿Rick話，近年已好少幫人化妝，只係每個月去一次老人院，為公公婆婆化個靚妝，事關好多老人家去到過身一刻，都未試過以靚妝影靚相。殊不知公公婆婆都極貪靚，成日叫佢整走面上嘅黑斑、眼紋，所以年輕人更加要趁早保養。「鮮花公主」龔嬿都帶朋友嚟趁熱鬧，卓妮見佢瘦咗又靚咗，原來最近愛上打泰拳及跑步，兩個月來已瘦咗十幾磅，成個人精神晒。不過，小妮子未滿足，話要再減多廿幾、三十磅喎！
卓妮