一場十號風球，唔止吹冧千幾棵樹，仲將香港呢個國際大都會嘅華麗外衣吹破。嗱，港鐵跪低，乘客變難民固然荒謬，而航空交通受影響，數千名旅客滯留機場，直至尋日仲未全部疏散，更加係怨聲載道。事實證明，國際大都會原來經唔起風吹雨打。
冇錯，颱風係大自然現象，人類冇辦法阻擋，但颱風可以預測，可以預警，今次冇理由搞到咁狼狽o架。韋森特喺上周六接近本港，周一清晨香港掛出三號波，當時天文台仲大大聲話當日改掛更高風球嘅機會不大，點知下午放工時段，天文台就改掛八號波，大批打工仔同一時間趕住歸家，交通唔亂就奇。更亂嘅係，天文台數小時內一改再改，先由八號改為九號，最後改為十號，搞到市民措手不及，交通亂上加亂。
今時今日科學昌明，技術先進，及早預報颱風，發放準確訊息，其實都唔係咁難嘅啫，點解天文台嘅反應總係好似慢咗幾拍呢？大家應該仲記得○六年颱風「派比安」襲港，風力強勁，連貨櫃都被吹冧，澳門一早掛起八號波，而香港天文台堅持只掛三號波，結果搞到亂晒大龍，險象環生。事後揭發，原來天文台墨守成規，只根據「維港之內」風速決定掛乜嘢風球，令人啼笑皆非。
講到墨守成規，香港現時採用嘅颱風訊號早就不合時宜。以前香港有一、三、五、八、十共五種風球，只要掛上三號風球，即表示颱風對香港有威脅，掛五號風球就表示畀市民喺颱風吹襲前有足夠時間準備。但七三年起，當局無端端取消五號風球，三號一跳就跳到八號，搞到天文台經常舉棋不定，猶豫不決。早喺幾年前已有人提議恢復五號風球，作為三號風球同八號風球之間嘅緩衝，就好似交通燈咁，綠燈同紅燈之間有橙燈，點知天文台食古不化，始終唔敢改變港英政府留落嚟嘅過時制度，結果次次颱風次次亂。講開又講，最無厘頭嘅就係九號風球，有八號同十號已經足夠喇，九號要嚟做乜吖？
正所謂，一榮俱榮，一損俱損，颱風無邊界，天文台唔單止要盡快撥亂反正，改善預報系統，仲應該加強同鄰近地區尤其係澳門及廣東合作。粵港澳三地關係愈來愈密切，但預測天氣就各自為政，完全唔符合時代要求。好似香港咁吖，有黃雨、紅雨、黑雨等暴雨警告訊號，但澳門同廣東都冇呢一套，搞到雞同鴨講，如果三地政府可以坐低傾吓，制訂統一嘅訊號及標準，颱風又好，暴雨又好，一目了然，利己利人，你話幾好呢！