教育局局長吳克儉早前秘密訪京，但事前並無發新聞稿及刊憲公布署任安排，結果引起政治風波，最後要勞煩「好打得」嘅政務司司長林鄭月娥大派定心丸，保證今後各司局長嘅官式外訪必定會公布。言猶在耳，尋日保安局局長黎棟國展開訪問廣州及深圳行程，即使係兩日行程都跟足規矩出稿，仲交代埋今次係禮節性拜訪，就連拜訪乜嘢部門及機構都交代埋，睇嚟吳克儉秘密訪京效應真係好強勁。
今次係黎Sir上任保安局局長後首次到境外訪問，團員包括保安局、警隊、入境處人員，尋日下午先去廣州，禮節性拜訪廣東省公安廳，今日就轉去深圳，拜會深圳巿公安局及大亞灣核電運營管理有限責任公司，下午就會返港。其實早前黎局長被傳媒問到他日外訪會否跟足規矩出稿時，佢就拍心口應承一定會出稿，估唔到佢真係講得出做得到。