泛民主派喺九月立法會選舉港島區選情可以話係非常嚴峻，特別係民主黨由單仲偕（(先刂)雞）重披戰衣，係咪能夠食胡真係好成疑問。放棄競逐連任、讓路畀(先刂)雞參選嘅甘乃威，近排忙到一頭煙，但原來唔係忙喺幫(先刂)雞助選，而係掛住自己周圍玩，睇嚟佢對(先刂)雞生死一啲都唔緊張。
甘威話冇做議員差唔多一個星期，同老婆去咗上海玩幾日，仲發現原來上海有條街叫「民主路」，好似發現新大陸咁。返到嚟香港後，佢都周身唔得閒，又話逼咗幾個鐘去灣仔書展買書，又要去深水埗黃金商場睇電腦同相機，節目填滿晒。不過，講極都未講到幫黨友助選，估唔到甘威寧願去上海條民主路，都唔幫黨友行香港呢條民主路。
我哋直接問甘威係咪同(先刂)雞不和，佢答得不置可否，關係有幾好可想而知。不過，講開甘威當年「怒炒女助理」風波中嘅女主角王麗珠，原來已低調重返政圈，負責幫參選立法會會計界功能界別嘅林智遠助選。參選會計界嘅仲有梁繼昌，而港島區參選名單就仲有新民黨葉劉淑儀、自由黨劉健儀、人民力量劉嘉鴻、民建聯鍾樹根及曾鈺成、工聯會王國興、公民黨陳家洛、獨立勞永樂、吳榮春及許清安。