政情：泛民未選賴定先
九月立法會選舉如箭在弦，有實事唔做、只係識炒作政治議題嘅泛民主派，最近又胡亂發炮撈取政治油水。民主黨（白鴿黨）涂謹申近日炮轟政制及內地事務局嘅選舉宣傳不足，尤其係無講清楚超級區議會議席嘅投票方法，影響市民投票意欲，要求局長譚志源落台咁話。不過，事實勝於雄辯，有政制局中人就寸爆泛民夾硬搵嘢嚟鬧，重提泛民喺去年已鬧政府無宣傳區議會選舉，但結果反而係投票率創新高，泛民輸到一仆一碌，印證泛民輸咗賴地硬。
泛民近年每逢選舉，都例必炮轟政府故意低調宣傳，想藉此拖低投票率，明益建制派。呢類指控去年區選亦出現過，當時大部分泛民候選人同親泛民學者，都言之鑿鑿咁預測區選投票率會再創回歸後嘅新低。結果去年區選投票率高達四成一，仲高過上一屆選舉，而泛民仍然輸到一敗塗地，一眾泛民敗將及學者全部跌晒眼鏡。不過，事後泛民並無痛定思痛，又賴區選高投票率皆因種票問題嚴重。
宣傳計劃一早準備就緒
為咗塞住泛民把口，政制局之後提議規定選民登記要提供住址證明以杜絕種票，但泛民隨即又心虛，擔心自己啲支持者會怕麻煩唔再登記做選民，令建議草草收場，僅要求新登記選民咁做。其實講到立法會選舉宣傳，據聞政府已準備咗一系列宣傳計劃，只係打算喺提名期結束後先至開動，無論規模同花款都比以往多，除咗傳統嘅電子同印刷宣傳渠道外，今年仲特別加強網上宣傳，目的係提高年輕選民嘅投票率。
由於新增超級區議會議席，選民將會一人有兩票，一票投直選，另一票就投超級區議會議席，據聞當局會以幼稚園學生都識嘅數學題「1+1=2」，嚟宣傳一人兩票嘅概念，同時亦會首次喺多項官方宣傳品中，為冗長又難明嘅「立法會區議會（第二）功能界別議席」名稱旁邊，加設俗稱「超級議席」嘅字眼，以便候選人宣傳及避免選民投錯票。如果泛民咁都話唔夠清晰易明，就等於話自己連「小學雞」都不如！泛民與其咁多挑剔，倒不如回頭是岸做好地區工作，否則好似去年區選咁輸到一仆一碌，相信冇人會可憐。