中環出更：陸羽懷舊粵菜 細味當年情
近八十年歷史嘅中環陸羽茶室，除咗品茗出名外，炮製小菜都一樣耍家。專門替一眾「為食貓」安排特色飯局嘅食評達人劉彬（Isaac），日前就去咗陸羽茶室同中菜部總廚禤智明及少東之一嘅陳定漢（Tony）齊齊翻出近四十年前嘅手寫菜單，大談懷舊粵菜同陸羽嘅歷史。
Isaac自小有腸胃病，自覺食量有限，於是開始「揀飲擇食」，後來仲喺社交網站facebook發起「食」者自付嘅飯局，吸引唔少同道中人參與。
憑住Isaac多年搵食經驗，成功游說唔少食肆烹調餐牌以外嘅懷舊菜式。當日禤師父炮製「古法糯米雞」，佢話原隻鮮雞起骨極考功夫，再以低溫炸二十分鐘，皮脆糯米香。禤師父憶述，三十年前曾被食客考起，要佢做隻名副其實嘅「糯米雞」，於是佢醉心鑽研咗呢味佳餚。
網油鯪魚卷 酥香不膩
Isaac又推介「冰肉豬油包」，以粗沙糖醃肥豬肉七日，香甜可口。全港獨有嘅「網油鯪魚卷」亦係Isaac至愛，以豬網油包住鮮打鯪魚肉炸至金黃色，酥香不膩。見大家食得咁高興，禤師父再來一味「子薑咕嚕肉」，酸甜適中，開胃無比，最後呷一碗招牌杏汁白肺湯，洗滌味蕾。講起陸羽茶室，唔少家族五代同堂咁幫襯，充滿人情味。禤師父話：「通常啲食客後生時鍾意坐三樓，年紀大咗就坐二樓，到行唔郁就坐樓下，飲到老人家走咗，親人都要喺度飲餐解穢酒。」
正當大家以為陸羽茶客大多數都係長者，Tony就話，原來百分之九十都係年輕人，真係估佢唔到。
近年舖租加幅驚人，Tony慶幸早於九○年已經購入舖位，否則難以維計。茶室生意好，但Tony坦言唔會考慮開分店，皆因人才難覓，陳年靚普洱亦買少見少，唔夠開分店用喎！
卓妮