中環蘭桂坊變咗引人犯罪嘅九反之地，嫉惡如仇嘅東方報業集團一連兩日大篇幅報道，卒之激發警方大規模掃蕩，二十四小時之內兩洗太平地。今日功夫茶有必要向罕見地從善如流嘅警方再進一言，有悲情城市之稱嘅天水圍危城告急呀，麻煩師兄師姐速速解圍，以免納稅人嘅血汗錢白白浪費！
其實唔止天水圍，其他偏遠地區例如元朗以及屯門，同樣潛藏住刀光劍影嘅莫大危險。到底係乜嘢危險咁得人驚呢？就係地下組織黑幫坐大嘞，隨時無法無天為非作歹。你知啦，黑幫一旦坐大將會問題叢生，黃賭毒任何一瓣都有可能搞到雞犬不寧。就好似蘭桂坊咁吖，如果唔係黑幫滲透，俗稱「炸彈」嘅迷姦水唔會氾濫成災，夜蒲老蘭嘅三十八歲寂寞女子亦唔會慘遭兩名搭訕男子迷暈輪姦再洗劫。
黑幫坐大嘅方法萬變不離其宗，不斷威逼利誘踢人入會囉，招兵買馬嘅主要對象係小學雞，貪佢哋不知天高地厚又以為做蠱惑仔好型好威風，殊不知黑幫之路其實係自毀之途。七月正好踏入悠長暑假，小學雞又好，中學雞都好，唔少青少年百無聊賴游手好閒，少不免三五成群流連街頭，黑社會大小頭目自然有機可乘。「有冇跟大佬？冇就跟我哋！」天水圍、屯門以及元朗就咁淪為黑幫徵兵場。
因乜事幹小學雞咁搶手嘅呢？無他嘅，升值潛力高吖嘛，家陣十歲八歲就話弱不禁風唔打得又唔睇得啫，假以時日快高長大咯喎，帶毒品又得，收陀地又得，劈友劈到腥風血雨都得。
講到呢度，功夫茶真係要懇請警務人員救救悲情城市，唔好淨係掛住亂咁玩大支裝胡椒噴霧鎮壓示威者，更加唔好動不動就勒令無辜小市民剝光豬搜身。天水圍呢一種偏遠社區，求職又唔易，交通費又昂貴，造成大量青少年無所事事，一不小心就會變成黑社會成功吸納嘅新血。警方如果唔去浩浩蕩蕩大舉掃黑，年少無知嘅小孩子就會染黑o架喇，後果係聯群結黨滋擾社區，悲情城市將會更加悲情。
除咗警方必須掃黑之外，新特首梁振英嘅新政府亦都責無旁貸，有義務為天水圍等等社區加強支援，例如增設青少年社區中心之類。喂，小學雞同中學雞係精力用之不竭嘅活躍分子，你唔提供正常途徑發洩精力，佢哋好容易誤入歧途o架。當然啦，人稱北斗星嘅社工更加唔少得，為瀕臨染黑嘅青少年指點迷津，慎防一失足成千古恨。
各位小學雞同中學雞甚至乎大學雞，假如有耐性睇到功夫茶寫到呢度，贈你哋十六字真言：近朱者赤，近墨者黑，回頭是岸，有事速逃！