立法會區議會（第二）功能界別議席（超級議席）係新事物，各大黨派及政團都奮力搶灘，但對於要取得十五個區議員提名，話多唔多，話少唔少。好似由九龍西直選轉戰超級議席嘅民協馮檢基（KK），數晒自己黨友都係得十四個提名，仲要靠外援幫手先取得「入場券」，據講佢為咗呢票已經好唔容易，到搵夠提名準備喺尋日報名參選，點知又因為十號颱風打亂佢啲支持者，臨時決定改期星期五報名，今次KK參選真係一波三折。
話說KK原本打算尋日去報名參選超級議席，據聞仲有一班公公婆婆會到場幫佢打氣。點知無喇喇打風，雖然朝早十點零鐘已經改掛三號波，但係KK都係擔心班公公婆婆橫風橫雨出門會唔安全，惟有死死氣改期報名，真係出師不利。其實今次KK轉戰超級議席，可以話係兵行險着。建制派對手有民建聯李慧琼、劉江華、工聯會陳婉嫻唔在講，依家仲要殺出個「白姐姐」白韻琹，KK都咪話唔驚。日前香港研究協會就出咗個民意調查，KK嘅支持度排名更加跌出五大添，睇佢今次真係背水一戰。泛民參選人仲有民主黨何俊仁及涂謹申。