政情：蜘蛛女分享毅進成功路
文憑試曲終人散，唔少考生依家仲好徬徨，唔知將來條路點行。尋日喺新毅進課程資訊日，有「蜘蛛女」之稱嘅長洲包山后鄭麗莎就向考生現身說法，原來一直瞓身喺運動事業嘅佢，○三年會考只得三分，當時唔少前輩同佢講，要有一定學歷，未來先有保障，佢於是報讀咗毅進課程，之後再銜接高級文憑課程，最後仲做埋大學生添！
鄭麗莎話，讀毅進係一個好好嘅經驗，一個升學嘅階梯，四年前佢仲做埋毅進課程嘅導師，主要教授紀律部隊課程入面嘅體能訓練、營養學、面試技巧等，呢啲都係做運動員需要嘅知識。佢又話，去教書係抱住「以生命影響生命」嘅態度，見到有學生讀咗成年仲渾渾噩噩，佢會用過來人嘅身份同學生分析，希望學生可以搵到適合自己嘅出路。
經過多年奮鬥，鄭麗莎已經係個好出名嘅運動員，除咗喺長洲搶包山比賽出盡風頭外，仲身兼運動教練、模特兒、舞台劇演員等，佢寄語學生，機會係留畀有準備嘅人，大家要有理想，為咗實現理想不斷提升自己，最終都可以成功。