流亡海外多年嘅前泰國總理他信（Thaksin Shinawatra），經常喺香港出沒，兩個月前至被本報發現佢與友人喺尖沙咀high tea。有泰國傳媒尋日爆料話，他信準備喺香港大搞六十三歲生日派對，眾多撐佢嘅忠實戰友會嚟香港送上祝福。不過，件好事差啲被十三年最勁嘅十號風球韋森特破壞晒，事關日前香港機場門戶大關，好多泰國朋友們滯留喺曼谷飛唔到嚟。好彩他信生日係廿六日（星期四），賓客仲有時間慢慢飛過來，虛驚一場啫！
有關報道話，他信原本準備喺澳門過生日，但係佢嘅心水地點容納唔晒所有泰國朋友，所以移師香港舉行，講到個生日會規模好大咁。不過，好多泰國朋友尋日喺曼谷啟程時，就遇上香港打風，風球仲愈掛愈高，認真好事多磨。對於外界高度關注他信究竟幾時返國，報道引述已抵港嘅泰國政要話，他信話無野心再返去執政，因為已服務國家多年，又話好享受遠離家國嘅感覺，事關全世界周圍走仲舒服喎！兩個月前，佢至講過一定會返泰國，究竟邊句先至真呢？