政情：八號波高懸 行會照開工
颱風韋森特成為香港近十三年以來首個十號波，雖然吹冧咗全港五百幾棵大樹，但就吹唔冧一眾行政會議成員嘅開會意欲。天文台尋日早上十時宣布，由八號波改為三號波，按照慣例行會理應唔使開會，但特首梁振英（ＣＹ）可能一早知道天文台會落波，九點鐘已經叫行會秘書處發通知，call齊行會成員十點半鐘開會，寧願遲啲開會都唔想停會。好多成員都樂意配合ＣＹ，仲話今次正正體現到ＣＹ所講嘅急市民所急，唔係得個講字。
ＣＹ上任後已經講明要提高行政會議效率，第一招係縮短暑假時間，估唔到未推行呢招，尋日已經有第一擊加強效率，就係風雨不改照開會。如果按照以往做法，只要早上十點前天文台仲掛緊八號波，當日嘅行會就會取消，但尋日天文台到十點十分先至改掛三號波，正當大家估計會停開行會之際，一班行會成員竟然十點半準時到達特首辦開會。原來係ＣＹ九點鐘已經落咗柯打，話預計天文台十點鐘會落波，希望大家十點半去開會喎。
熟知老細脾性 整裝待發
我哋問番部分行會成員，好多都唔介意冒雨去開會，唔係因為咁樣開會浪漫啲，而係佢哋好熟習ＣＹ脾性。非官守議員張志剛就話，ＣＹ向以勤力見稱，一早已經估計只要唔係狂風暴雨，以ＣＹ性格都會照開會，所以一早就出咗門口到中環返工，如果收到行會秘書處柯打，再去特首辦開會都無乜問題，唔會好狼狽。
另一位行會新鮮人李慧琼（Starry）就話，未收到行會秘書處通知前，已經喺屋企整裝待發，九點鐘一收到柯打，就算掛緊八號波都衝出門口，以免塞車遲到喎。向來係「無車一族」嘅Starry話，由於趕唔切叫的士，就叫咗老公做柴可夫司機，車佢去特首辦開會，Starry仲話今次事件，不單止顯示到ＣＹ勤力嘅一面，仲顯示到成個行會團隊好「齊心」，因為尋日只係好少人無去開會。話時話，咁忙嘅Starry有老公揸車接載，仲可以喺車廂溫馨多一陣，呢個颱風都算打得合時啦。