中環出更：鮮忌廉：唱國歌唔代表愛國
有「政壇鳳凰女」之稱嘅前高官黃錢其濂（鮮忌廉），趁尋日書展煞科趕搭尾班車，為自己嘅新書《學好英文》舉行發布會，曾經同於政府共事嘅「媽打」李麗娟同余黎青萍（Helen）都畀面撐場。不過，論及近日極具爭議嘅德育及國民教育科課程，做過教育署署長嘅Helen就同鮮忌廉有唔同嘅意見。
現時身為補習天后嘅鮮忌廉認為，要學生愛國，並唔係唱吓國歌咁形式化就得，而係要培育學生甘願為國家作出貢獻嘅情懷，若然由佢擔任教育部門嘅話事人，推行嘅政策可能同依家唔一樣。至於Helen就覺得，向學生灌輸國民意識及德育觀念係應有之義，大家毋須太敏感，對於家長嘅疑慮，負責嘅官員應詳加檢討以釋除誤解。
講番鮮忌廉嘅新書發布會，佢就自爆細個由上海移居香港，連粵語都唔識，學英文更倍感艱難。
錯跟女傭學英文
為咗要入讀女拔萃名校，鮮忌廉竟向家中女傭請教，可惜傭工無法區分發音相近嘅英文，連名詞動詞都混淆不清，幸好學校教師好快發現鮮忌廉嘅英文「學壞師」，馬上糾正以免習非成是。
Helen就話，媽媽向佢教字母與拼音，成為佢嘅英文啟蒙，而香港崇德社主席梁慶儀就憶述當年完成中六後往英國升學，要下苦功朗讀文章以改善英文水平。
卓妮