傳媒力量，無可限量，再一次證明東方報業集團嘅影響力係幾咁強大。呢嗱嗱嗱，《東方日報》及《太陽報》一連兩日大篇幅披露蘭桂坊變咗九反之地，有人賣淫，有人販毒，有人開片，即刻引起警方高度重視，二十四小時之內兩度反轉老蘭。有東方，冇窮人，大家聽得多；有東方，冇衰人，遲啲可能變成事實。
警方第二次掃蕩老蘭嘅反罪惡行動代號係OMEGA，夜晚七點已有幾名軍裝警員巡邏街頭，不時向可疑男女查核身份證，OMEGA行動於十一點正式展開，中區警區出動反黑組、牌照科以及巡邏小隊，聯同港島區機動部隊總共大約五十人直搗黃龍，並且派出五歲雄性緝毒犬Ossie協助。大批警員踩入多間酒吧調查，當中以藏污納垢嘅樓上酒吧為主。
警方再一次洗太平地即時見效，老蘭玩家收斂不少，未見迷亂醉娃出沒。據了解，警方近日特設老蘭輔警通宵更，增派八名輔警加強區內巡查工作。每逢周五、周六以及公眾假期前夕，警方亦會派出一隊由一名督察帶領嘅小隊去蘭桂坊查牌。你知啦，倫敦奧運即將開幕，估計老蘭更加熱鬧，增派警力以防蘭桂坊出事係理所當然嘅事。
喂，老蘭濫藥問題真係相當嚴重，有人引入無色無味的迷姦水「炸彈」，玩家潮語係：「你今日炸咗未？」受害女性不知凡幾。唔知係咪又有色魔出動迷姦水炸女，旺角發生駭人聽聞嘅輪姦盜竊案，一名三十八歲女子喺蘭桂坊飲悶酒，懷疑有兩名男子搭訕暗中落迷藥，迷迷糊糊被帶去旺角賓館，慘遭輪姦並且洗劫一空。
所以話啫，警方真係要鐵腕滅罪o架，唔可以任由前朝政府繼續遺禍害人，以免醉娃遇着人渣。冇錯嘞，蘭桂坊搞到變咗九反之地，同前特首曾蔭權有莫大關係。道理一字咁淺，執法者懶於執法，犯法者勤於犯法，前朝政府疏於職守冇去蘭桂坊維持治安吖嘛，治安咪江河日下囉，該煨！
即係咁，新政府一見到傳媒揭出老蘭瘡疤，馬上雷厲風行派出差人做嘢，係從善如流嘅表現，值得功夫茶讚一個叻。之但係咁，做人做事都唔可以三分鐘熱度，老蘭洗太平地唔應該洗一次兩次就算鬼數，必須再接再厲打造一個長治久安嘅局面。情況就好比當年煲呔曾未吹口哨做特首之前，出任全城清潔掃街大隊長，你估係咁意掃一兩次街就乾乾淨淨哩咩？梗係唔係啦，掃街同滅罪都係一樣嘅，必須持之以恒。
掃蕩蘭桂坊方向正確，功夫茶懇請警方千祈唔好學「掃街曾」虎頭蛇尾，拜託拜託！