立法會超級區議會選舉係新生事物，各大政黨嘅參選人都各出奇謀爭曝光機會，張貼海報及派傳單呢啲都係指定動作，近日網上更流傳一張民建聯參選人李慧琼（Starry）貼喺唐樓近門口梯間嘅宣傳海報，張海報正正經經冇乜問題，但唔知有人有心定無意，定係事後有人「二次創作」，Starry張海報隔籬有張黃色架步嘅價目表，變相令人有另類聯想。
我哋問過民建聯中人貼海報嘅一貫做法，佢話一般嚟講有兩個方法，一係搵義工幫手去貼，一係就交畀大廈業主立案法團，由佢哋決定貼喺邊度喎。Starry就回應話，九龍西唐樓有「一樓一鳳」都唔出奇，但相信同事唔會特登貼喺嗰啲地方，話颱風過後會派人了解。
話時話，Starry疑似被惡搞已非首次，早前畀人將佢「做個有公德心狗主，請妥善清理狗隻便溺」嘅橫額，惡搞成「狗隻李慧琼便溺」，搞到要向警方備案，唔知今次Starry又會點處理呢？已報名參加超級區議會嘅仲有民建聯劉江華、工聯會陳婉嫻、獨立白韻琹、民主黨何俊仁及涂謹申。