行政會議成員李國章擔任教育統籌局局長時，曾經喺立法會會議上用電子手帳玩「鑽石方塊」遊戲，結果被學生話佢唔尊重議會，點知類似事件日前又再上演。有內地報章指南京大學日前舉行「海峽兩岸暨港澳地區大學校長論壇」，香港城市大學前校長張信剛都獲邀出席，但喺佢演講時，內地浙江大學校長竟然喺台下用手提電腦玩啤牌遊戲，仲畀人影咗相擺上微博，唔知浙大學嘅學生見到之後會點睇呢？
雖然張信剛已卸任城大校長一職，但依然好熱心投入教育工作，日前仲遠赴南京出席當地嘅大學校長論壇，同台灣、內地、澳門及本港共四十幾個大學校長交流，睇吓點樣去弘揚中華文化及加強大學之間嘅教育合作。
不過，有網民就喺微博貼咗張相，話張信剛發表精彩演講時，浙江大學校長楊衛就用手提電腦聚精會神咁玩啤牌遊戲，張相就喺微博迅速畀人轉發咗超過一萬三千次。