社民連「掟飯男」黃浩銘曾向貪曾掟粟米斑塊飯「一掟成名」，原本諗住再下一城參加立法會選舉，狙擊已報名參選九龍西嘅專業會議梁美芬，點知十多日前突然覺得胸口痛，之後睇醫生先知原來自己「爆肺」，即胸膜穿咗令胸膜積聚空氣，為免選舉期間太過勞累，「掟飯男」惟有無奈放棄參選。
事實上，「掟飯男」棄選對於社民連都有一定影響，因為原先社民連打算喺五區都會派人參選，但依家就變咗「五缺一」陣式，雖然如此，但佢哋喺議會內外抗爭嘅路線始終如一。
「長毛」梁國雄揚言，如果港府強推《基本法》二十三條或政改方案，佢哋唔會戀棧權位，唔排除再用「五區公投」嘅方式讓港人表達意見喎，當然佢哋到時會同其他泛民主派再作商討。
已報名參選九西嘅仲有民主黨黃碧雲、公民黨毛孟靜及民協譚國僑名單。