政情:余鵬春暑假去古巴拍拖

每年踏入七月又到旅遊旺季,政商界名人紛紛外遊歎世界。早前喺一個活動上見到裕華國貨董事副總經理余鵬春,佢都話暑假會同太太外遊享受二人世界,首選係去位於加勒比海北部嘅古巴,事關佢未去過,又聽朋友話古巴近年逐步開放,所以好想快啲去見識吓喎。

先陪太太去美國

一向愛妻嘅余鵬春話,佢暑假會先做「跟得先生」,陪身兼瓷畫會總主席嘅太太Ida飛到美國,出席當地嘅瓷畫會展覽,之後接住去古巴。佢笑笑口話,眼見古巴近年同中國關係愈來愈緊密,自己都心郁郁,想去睇吓當地有冇商機。至於仔女,佢就話仔大仔世界,各有節目,佢就可以趁機同太太拍吓拖喎。

講到裕華盤生意,余鵬春話上半年生意一般,對下半年市道亦唔係咁樂觀,眼見唔少商戶提早搞大酬賓,排隊條龍都短咗,惟有寄望暑假長假期會有好轉。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報