政情：三副局人選臨陣縮沙

政府早前為聘請副局長面試咗三十九個申請人，但因為有五個政策局未能提供兩個候選人畀局長挑選，惟有延長公開招聘。事隔成個月，政府應該已經完成遴選，但係出奇地至今仍未公布副局長名單。有知情人士就向我哋透露，政府未公布名單係因為有最少三個已敲定嘅副局長人選臨時縮沙，因為唔同嘅理由決定唔出任副局長職位。

擔心未發圍先惹周身蟻

新班子最近面臨種種挑戰，被泛民主派拖垮政府架構重組方案唔在講，加上立法會選舉如火如荼之際，好多長年累月只係靠食老本嘅政團實會藉住批評CY、砌新班子嚟博出位拉票，呢班副局長唔排除一上任就成為被人攻擊嘅目標，到時真係未發圍為市民服務，自己就已經搞到周身蟻，所以有人縮沙一啲都唔奇。不過，知情人士就話幾個準副局長唔撈並唔係因為政治因素，仲話︰「好似一般人搵工咁之嘛，就算請咗都唔一定要做嘅。」

喺六月中我哋曾經率先報道過警務處副處長李家超好大機會出任保安局副局長，由警隊二哥變保安局二哥。我哋尋日見到保安局局長黎棟國，自然追問副局人選啦，點知黎局長就答話：「陳李張黃何，歐周胡馬麥，十大姓氏實有一個中！」答案盡在不言中，睇嚟保安局未必係有人會退陣喎。

我哋都問過幾個有份應徵副局長嘅申請人，有人就話去得面試都係有心服務市民，唔會為咗明哲保身而放棄，但係亦有人認為依家政府咁多問題出現，梗係要重新考慮啦。不過，就算有人縮沙，政府理論上都唔會公布退陣名單，究竟邊啲人唔撈我哋真係無從稽考。

不過，大家亦都唔使可惜，因為臨陣退縮嘅人對社會幾有心、有幾承擔，真係不言而喻。