中環出更：林鄭原來係「愛馬仕」粉絲
唔少富豪名媛都鍾情法國名牌「愛馬仕」（Hermès），原來政務司司長林鄭月娥都係呢個品牌嘅粉絲。林鄭上周六落區宣傳立法會選舉時，雖然與同行者着住一式一樣嘅宣傳Polo衫，唯獨佢將件恤衫攝入褲頭，露出大大個「H」嘜頭嘅Hermès皮帶，成功突圍而出。
當日林鄭出席完立法會選舉宣傳啟動禮後，就同政制及內地事務局局長譚志源等高官落區，先後去柴灣及北角同青年人會面交流，順便介紹吓政府新推出嘅青年宿舍設施。平時着開套裝裙嘅林鄭，當日為咗配合活動，同大家齊齊着上印有「立法會選舉」字樣嘅Polo衫配牛仔褲。
不過，林鄭件衫可能太長，於是佢將件衫攝入牛仔褲頭，除咗騷佢條纖腰外，仲不經意露出條Hermès皮帶。據知呢條皮帶價值五千至六千元，睇嚟林鄭都幾捨得裝身喎。