中環出更：洪為民新書暴風雨中面世
颱風韋森特來襲，天文台尋日傍晚要急急高掛八號波，本來人山人海嘅書展都被迫提早收檔。揀正尋日開新書發布會嘅菁英會榮譽主席洪為民（Witman）亦一度好狼狽，事關唔少捧場嘉賓被卡在入場人龍內，動彈不得，有份上台講嘢嘅Roundtable Community總幹事林輝，亦被困四十五分鐘，搞到遲晒大到。
Witman本新作《公義為民》，雖然揀正在狂風暴雨中面世，但多位菁英兄弟冒着傾盆大雨，下午照樣到會展打氣，包括創會主席施榮忻、「燕之家」老闆白富鴻、菁英會主席楊華勇、常務副主席梁宏正、副主席莊家彬，仲有廠商會會長施榮懷等，夠晒墟冚。可惜受風雨影響，唔少嘉賓姍姍來遲，林輝喺發布會開始時，仍未見人，一度令Witman急如熱鍋上螞蟻，不停打電話教佢走「捷徑」，另選其他入口進場。
洪綺敏笑林輝「守秩序」
林輝最後匆匆趕到，比原定時間遲咗半個鐘，擔任嘉賓主持嘅前特首候任辦公室公關主任洪綺敏就笑佢點解搞慣街頭抗爭，忽然咁守秩序。林輝笑騎騎話：「排隊守秩序，係應該嘅！」等林輝抖順條氣，Witman擺下擂台陣，請對方就主講題目「ｅ世代公義‧為民」，探討年輕一代點睇社會公義。點知颱風愈吹愈近，大會不斷催促兩位講者「長話短說」。對談氣氛，未見拗到面紅耳熱。
Witman就感慨話，今年書展「獨沽幾味」，只有惡搞及嬉笑怒罵嘅書籍先會大賣，一啲深入探討社會問題嘅新書，想搵本睇吓都難喎。
卓妮