每次選舉前夕，候選人宣傳品隨處可見，不過有人疑似偷步，喺未抽籤編配號碼嘅情況下，周街展示選舉宣傳品，呢個做法當然係違規，最離譜係有人喺周末向當局舉報，得到嘅回覆竟然係投訴熱線只限周一至周五辦公時間先接收投訴，咁即係喺周末，參選人為所欲為都得喇。
我哋收到有市民投訴，話有已報名港島區參選人喺周末，分別於北角同西灣河多處地方，展示多個橫額同直幡，疑似違反相關選舉條例，隨即向當局作出投訴，點知有關方面嘅回覆係投訴熱線只限辦公時間接收投訴，又話你依家投訴都得，但只可透過傳真或投入收集箱內，有關方面喺辦公時間自然會處理喎。
如果要辦公時間先處理選舉投訴，變相助長某啲參選人利用疑似灰色地帶，「合法化」展示自己啲選舉廣告。今年選舉競爭咁激烈，如果大家都利用呢個灰色地帶，真係會亂到無眼睇o架。