政情：冇份選立會 好多人憔悴

功能界別係失意軍人嘅集中營之一。政圈盛傳西環出手勸退有「四大懶蟲」稱號嘅體育界霍震霆（Tim霍），Tim霍對此一直採取曖昧不回應態度，不過有接近Tim霍人士就話，身兼港協暨奧委會會長嘅Tim霍去咗倫敦睇奧運會，樂而忘返，一直到下月十五日，立法會選舉本月底就截止報名，所以佢參選嘅機會已經近乎零。

何栢霆胡兆英料棄選

旅遊界係另一個失意人嘅重災區，業界最新消息話該界別經協調後，好大機會只有中旅副總經理姚思榮同金怡假期董事長葉慶寧對決，一度磨拳擦掌出選嘅自由黨何栢霆同經濟動力胡兆英，喺自知勝算一般下，料將會雙雙棄選。

要等多四年先有機會再選嘅人，喺區議會超級議席同地區直選更加係俯拾皆是。民建聯副主席張國鈞（Horace）原本係參選超級議席嘅熱門人選，但最終卻願望落空，有傳黨有心栽培佢入政府，所以無奈地要佢棄選，另有指Horace棄選主要係想多啲時間陪同僅三個半月大嘅囡囡。工聯會周聯僑係另一個疑似失意人，喺西環全力勸退下料參選機會極微。至於新民黨副主席史泰祖，有傳佢突然退居幕後同去年底畀人踢爆佢上水間別墅霸佔官地，事後對政治熱情有所冷卻有關。

不過，有人失意亦有人可能選擇自行引退。據聞自由黨副主席方剛今日會報名角逐連任批發及零售界，不過有傳方剛此舉只係緩兵之計，只係為黨內不知名嘅接班人做掩護，到提名期最後一刻自會退選讓位，呢個傳聞真係信不信由你喇！