中環出更：被困北京機場 善心人打救許華傑
北京遭遇六十年難得一見嘅大暴雨，京城一夜間變澤國。中華出入口商會副會長許華傑（Michael）都遭殃，佢上周六帶兩個仔上京參加國情班，撞正大暴雨，折騰到半夜三點，班機至抵達北京機場，終於靠好心北京市民義載佢去酒店，至可以逃出生天。
遇氣流先轉飛大連
霎眼間北京天氣迅速好轉，Michael尋日同囝囝去萬里長城曬太陽，享受暴雨後嘅陽光。佢透過長途電話講番今次驚險之旅，話前日同八歲大仔Marcus及四歲細仔Malcolm由廈門出發，點知一波三折，先係航班延遲咗三粒鐘先起飛，當飛抵北京上空時，忽然遇上巨大氣流，飛機猛烈搖晃，唔少乘客被嚇得尖叫同嘔吐，機師因無法降落，惟有轉飛大連。
幾經波折，Michael於尋日凌晨三點幾抵達首都機場，但的士因水浸嚴重入唔到的士站。正喺徬徨之際，有市民召喚佢登上志願者林森嘅吉普車，原來有北京居民喺微博發起義載，數百市民響應。有善心人拔刀相助，Michael一家最後安全抵達酒店，佢想話畀番油錢，對方婉拒。Michael深受感動，一於將善舉上載社交網站facebook，表揚吓對方喎。