中環出更：炮製港式奶茶 各國領事過足癮

一眾駐港領事之中，有幾位舉止斯文嘅靚女領事，拉茶拉得好落力，咖啡紅茶協會黃家和（Simon）試完佢哋沖嘅奶茶，都讚有天分。德國駐港澳領事館代表Ricarda Neukam來港僅三星期，佢話從未飲過港式奶茶，今次初嘗，大讚口感豐腴滑溜。

金茶王現身傳授秘技

馬來西亞商務專員鄺琬琳就話，馬拉嘅奶茶係用煉奶沖製，味道較甜，同層次豐富嘅港式奶茶相比，佢坦言較喜歡後者。印度駐港領事Chander Bhan仲帶咗三種貴族名茶畀大家認識，其中一種係著名嘅大吉嶺紅茶。領事笑言一公斤大吉嶺茶葉，隨時貴過部iPhone 4S。

咖啡紅茶協會副主席卓鳳婷（左）及印度領事Chander Bhan齊乾杯。

馬來西亞商務專員鄺琬琳（右）及越南副商務領事武氏翠（左）都對港式奶茶一飲鍾情。（徐家浩攝）

○九年金茶王陳偉聰都有現身教授沖茶秘技，佢話港式奶茶包容性高，唔淨只得西冷紅茶可以用嚟沖茶，其實潮州茶、單叢、鐵觀音同龍井都可以用作奶茶底。Simon自十四歲已沖出第一杯港式奶茶，佢話要促進各地文化交流，齋講冇用，要身體力行，好似港式奶茶咁，識飲之餘仲要識沖，先至真正了解文化精粹喎。