哎吔哎吔，都話淫媒隨時教壞細路o架啦，你睇你睇，真係有個好鬼死壞嘅細路搞三搞四呀，搞到人心惶惶。
旺角海富苑喎，有一個七歲小妹妹，原本天真爛漫，家陣驚慌失措，原因係受到心靈上好大嘅創傷。有一晚七點幾鐘，小妹妹同媽媽逛街之後返屋企，咁啱去到寓所樓下嘅時候，媽媽突然諗起有事要做，加上小妹妹約咗老師喺屋企學鋼琴，於是就叫佢自己一個上樓。小妹妹搭𨋢獨自歸家啦，一個身穿紅色學校運動服嘅少年郎尾隨而入，估計係一個中學生。呢一個哥哥仔表現輕佻，不時左顧右盼，仲跟住小妹妹喺十樓出𨋢添。一出到𨋢就色膽包天嘞，少年郎魔相暴現，突然從後一手撳住小妹妹個口，企圖將佢夾硬拖去後樓梯，動機唔使講梗係令人髮指嘅性侵犯啦。
就喺千鈞一髮嘅緊急關頭，處於險境嘅小妹妹雖然嚇到唔敢高聲呼叫嗌救命，不過好彩佢仲識得激烈反抗，結果成功擺脫魔爪，跑向升降機逃亡。校服色魔眼見事敗，當然作賊心虛不敢久留，沿後樓梯逃去不知所終。不幸之中嘅大幸係，呢一個小色魔亦係一隻小蠢蛋，身穿容易辨認嘅校服不特止，仲要冇遮冇掩任得閉路電視拍下廬山真面目，接報受查嘅警務人員相信可以按圖索驥將小色魔繩之於法。受害小妹妹就慘咯，經過呢一次咁大嘅打擊，情緒一直未能平復。
講完一個咁得人驚嘅風化案古仔，大家有乜嘢感想冇呀？功夫茶嘅感想就係，時下青少年非常容易學壞，事關不良資訊唾手可得，尤其係誨淫誨盜嘅《爽報》免費派通街。《爽報》內容鹹鹹濕濕賤賤格格已經得到坊間公認，由十八個不同團體組成嘅「反色情暴力資訊運動」做過一項調查，對於五份免費報章嘅睇法，超過六成受訪者認為《爽報》對青少年嘅道德觀念最有負面影響，百分之十八受訪者認為《爽報》內容最空洞簡單。好衰唔衰，特區政府同港英餘孽包庇縱容，創刊短短日子雖然已經多次違反《淫褻及不雅物品管制條例》，但係官老爺只係就每項罪名輕輕罰款一萬元算鬼數，雞碎咁多嘅罰款對於淫媒老闆淫賤黎簡直微不足道。
官僚包庇都唔止，淫賤黎仲同無良政棍眉來眼去。公民黨同民主黨收過淫賤黎二千五百萬元捐款，所以咯喎，立法會出現民間團體公審《爽報》嘅時候，一向仁義道德嘅兩黨議員就粒聲唔出，受人錢財替人消災嘛，鬼叫無良政棍收咗掩口費咩！
肆虐海富苑嘅校服色魔到底受到《爽報》幾多荼毒？功夫茶提議，警方捉到人之後直接問下佢。