立法會法律界嘅資深議員較早前決定棄選，各方都對於呢個議席虎視眈眈，曾喺回歸前做過立法局助理法律顧問嘅王桂壎（Huen）尋日率先表態參選，表明自己有晒心理準備會畀人「抹紅」，又話冇可能為咗印證自己唔紅而唔要回鄉證喎，睇嚟信心十足。
法律界一直係泛民主派嘅天下，不過泛民今年好大機會僅派出資歷較淺嘅公民黨郭榮鏗參選，喺業界有一定名聲嘅阿Huen決定加入戰團同佢一較高下。
據聞阿Huen至今取得逾四百名業界選民提名，佢嘅支持者包括前律師會會長黃嘉純、前私隱專員吳斌等，又以「為民主企硬，同業界發聲」為競選口號，驟眼睇同泛民冇乜大分別。
不過參選得就預咗會有各種抹黑或者標籤，阿Huen過去一直為業界奔走中港兩地，難免會有人出招「抹紅」，阿Huen對此有晒心理準備，強調今次參選主要係一班業界年輕人嘅鼓勵，所以先令佢決心參選一試喎。