政情：民建聯民協公布參選名單
民建聯尋晚公布出戰九月立法會直選嘅名單，一共派出五十三人競逐，其中港島區派出兩隊，分別由曾鈺成及鍾樹根領軍，九龍西名單則以蔣麗芸排頭位，九龍東繼續派出陳鑑林，新界西嘅三隊，分別以主席譚耀宗、梁志祥及陳恆鑌等為首，新界東兩隊就包括陳克勤及葛珮帆團隊，而劉江華及李慧琼就出選功能組別嘅超級區議會議席。
民協七人將分成四張名單出選，其中立法會議員馮檢基會出戰區議會超級議席，民協主席廖成利會出選新界西，副主席譚國僑喺九龍西，而許錦成就會出選九龍東。
今屆立法會功能組別可謂激戰連場。好似紡織及製衣界咁，經濟動力陳亨利大戰自由黨鍾國斌。尋日陳亨利正式宣布參選，仲搵到福建幫大佬力撐，如果福建幫真係「祝福」陳亨利，選情就比鍾國斌看高一線喇。福建社團聯會會長林樹哲尋日唔止現身陳亨利記者會，仲講明佢手頭有幾廿票，全部都會過畀陳亨利喎。