政情：徐英偉靜靜雞應徵文化局
特首梁振英嘅政府架構重組方案胎死腹中，最快要年底先可以通過，搞到之前高調進行嘅副局長遴選亦被迫暫緩，大部分副局長人選都仲未可以公布。我哋收到消息，上屆民政事務局局長政治助理徐英偉（Caspar），早排原來靜靜雞走去應徵做文化局副局長。
Caspar做咗政助幾年，口碑尚算不俗，至少肯成日蒲頭，同各級議員拉關係；自從任期屆滿後，Caspar去向一直成謎，即使點樣旁敲側擊，佢始終唔肯透露半點風聲，加埋佢近日不時將家庭照貼上社交網站，唔知仲以為佢等退休添。
有知情人士就透露，原來Caspar早排已經參加咗文化局副局長面試，據聞機會唔錯。
不過，坊間一直要求文化局領導層應該由業內人士擔任，幾可肯定做文化局局長嘅民政事務局副局長許曉暉早受批評冇文化背景，如果Caspar都入埋文化局，業界會唔會接受，都係未知之數。