中環出更：立會惜別晚宴 處處弦外之音
立法會會期結束，尋晚係四年一度嘅惜別晚宴，除咗有特首同司局長外，仲邀請埋一批前任局長，加埋幾十位議員，新知舊雨聚首一堂，大家不計前嫌往事，但求對酒當歌。不過始終係政治人物，個個講嘢時都有弦外之音，連惜別晚宴都不忘寸人幾句，唔知係咪咁先食得高興啲呢?
特首梁振英（CY）致詞時候話，立法會唔係佢主場，惟有講番啲關於立法會嘅嘢，佢笑笑口話，見到立法會近年工作繁忙，要增聘人手應付，希望日後政府要加人，立法會要理解同體諒喎，睇嚟佢對五司十四局架構重組建議未能通過，個心仲係耿耿於懷。其實講到致詞，立法會主席曾鈺成講得更啜核，佢話要多謝班泛民，全靠佢哋發言時間夠長，令佢可以休息，又話無佢哋幫手拉布，對佢自己嘅不信任動議已經提出咗。
周一嶽「音魂不散」
好耐無見大家嘅前教育局局長孫明揚並無致詞，但亦有兩招過畀現任局長吳克儉，分別係「有問題就答」同「靠自己」，退出官場後，真係零舍風騷。
可能無咗「酒神」黃宜弘在場，無邊個議員肯身先士卒，周圍撩人飲酒，所以尋晚咁多位議員都好克制。但高潮位肯定係前食物及衞生局局長周一嶽唱歌，佢老兄再次唱首本名曲《忘不了你》，令全場HIGH爆，仲要連唱幾首，唱到無停口，無咗佢真係失色不少呀。晚會仲有一個神秘環節，原來係CY率領一眾高官獻唱《前程錦繡》，一於把握機會，顯示團隊精神。
卓妮