中環出更：莫慶堯乖孫出書 助中大籌款
已故大慈善家莫慶堯嘅家族後人，尋日喺莫老太帶領下現身中環交易廣場，事關莫家乖孫莫禮恩（James）出咗本歷險小說《超越時空的挑戰》，收益將捐畀中文大學嘅「博群計畫」。James今年十六歲，但本書係佢十歲喺澳洲讀緊小學五年級時創作，內容講述四位少年穿越時空，尋找解藥醫治媽媽嘅癌症，主題夠晒正氣兼且發人深省，難怪城中名人世叔伯齊現身撐場。
前首席大法官楊鐵樑（楊官）新抱楊余夏卿及兩位兒子齊捧場，原來兩家人係世交，小朋友自細玩到大，楊官仲幫本書寫序添！James嘅爸爸莫華昇透露，中大中國文化研究所莫慶堯學術講座年底將喺牛津舉行，估吓講者係邊個？竟然係退任後決定到牛津大學讀神學嘅前政務司司長林瑞麟。
莫華昇原來係「龍袍大王」
卓妮同莫華昇傾開，至知佢大有來頭，雖然佢正職係律師，但由廿幾歲開始玩收藏，清朝歷任皇帝嘅龍袍幾乎集齊晒，稱得上係「龍袍大王」，絕非一般業餘玩家。
佢笑稱，若果計埋妃子、王爺等帝王之家嘅官服或便服，佢嘅收藏品就會超過一百件！中文大學文物館現時就正在展示緊莫華昇借出嘅矜貴龍袍喇！
沈祖堯做咗中大校長後，連續兩年勇奪本港大學最佳校長寶座，佢話好多謝教育界對佢嘅肯定。佢認為大學應該回歸作育英才嘅教育本質，唔好太強調競爭及排名，要以學生為本，多啲同學生溝通，可能係呢啲理念獲得大家嘅認同。
卓妮