中環出更：莊偉茵叉足電準備過檔
過埋暑假就會過檔中電做企業發展總裁嘅國泰企業事務董事莊偉茵（Quince），依家處於交接期，除咗要帶住未來接班人、時事評論員周融太太張鳳婷熟悉工作環境外，又要出席老友為佢搞嘅farewell派對，真係分身不暇。為怕遲啲轉新工後更忙，Quince日前暫別世俗煩囂，同老公黃楚權及兩個囝囝去英國倫敦玩番轉先再返新工搏殺。
一家四口自駕遊倫敦
Quince話自己並非首次遊倫敦，所以喺網上搵定資料，精心策劃今次旅程，一家四口自駕遊到處兜風，抖吓氣。撞正倫敦奧運就快舉行，唔少地方都進行道路工程，到處人多車多，Quince就決定向牛津大學城進發，期間包括到過牛津大學圖書館嘅醫學及科學書籍館Radcliffe Camera參觀。
Quince笑笑口話，雖然自己無緣入讀牛津大學，睇吓都好嘅！至於兩個仔，佢話囝囝依家喺澳洲讀書，如果有機會，佢都會畀佢哋去牛津大學參加暑期遊學團。
卓妮