生老病死，人生四苦，凡夫俗子個個都走唔甩。人生匆匆數十寒暑，最無奈之事莫過於，人在天堂，錢在銀行。
既然人人都會百年歸老，身後事係咪應該做得好好睇睇？當然應該啦，慎終追遠係中國人優良傳統，即使唔係風光大葬，起碼夠體面先至一路好走吖嘛。之但係咁，香港有一個失禮死人嘅政府部門，辦事作風永遠係唔理人死活，骨灰龕位問題固然長期未解決，連火葬場都不敷應用。孝子賢孫痛失親人已經夠慘o架啦，一旦預約唔到火化服務，出殯都唔知點算好。呢一個政府部門叫做食衞局，管轄範圍正正係全港七百萬人嘅生老病死。
食衞局旗下嘅食環署負責提供火化服務，現時全港火葬場有六個，市民可親身或授權持牌殮葬商透過派籌方式，預約十五日內嘅火化時段，每位輪候人士可領取五個籌號。之不過咁，和合石火葬場現正進行重置工程，實際可提供服務嘅火葬場只剩五個，可供預約嘅火化時段買少見少。五個火葬場之中有一個位於長途跋涉嘅長洲，基本上係冇人會去嘅。
火葬場供不應求有乜嘢問題呢？首先，排隊排餐懵，有人前一日下午已經親臨灣仔辦事處通宵排隊，慘烈情況同每年七月書展逼爆玻璃不遑多讓。其次，肯排隊都未必攞到籌，事關排隊制度容許一人五籌，造就排隊黨日益猖獗，真正用家無法預約。再者，預約時間可能失去預算。有一位親人近日離世嘅黃先生話：「一早安排都夾唔到出殯時間，食環署啲職員叫我揀早啲，但邊度有火化完先出殯o架！」黃家迫於無奈選擇長洲火葬場，親友山長水遠去鞠躬。
所以話啫，食衞局同食環署真係失禮死人o架，如果有人被迫一反傳統先火化後出殯，上咗天堂都畀人笑餐飽。殯儀業協會永遠榮譽會長吳偉棠指出，火化服務一直供不應求，早於幾年前已向食環署建議改用電話或網上預約，但係至今未落實，導致火化地點同時段仍然必須價高者得，受害嘅係小市民。
好心食環署唔好咁懶懶閒啦，快啲全面改善服務質素。人生有兩件大事，一係紅事，二係白事，紅事有機會搞幾次，白事必然只搞一次，你冇理由將人哋唯一一次嘅人生大事搞到一鑊泡啫，吓話！
新政府雖然亂中開局，不過功夫茶仍然有少少期望，麻煩食衞局新局長高永文雷厲風行大革新，一洗前局長周一嶽頹風。你知啦，提供足夠嘅殮葬服務為人為己都係一大功德，試問邊個高官用唔着吖？做嘢啦，高局長！