政情：立會醫學界選戰大混亂
九月立法會選舉功能界別議席競爭相當激烈，除咗工程界出現三人混戰外，醫學界亦係醫生兵家必爭之地。一直盛傳醫學界議員梁家騮（怪醫）不再競逐連任，引來業界人士虎視眈眈，據聞曾經擔任四肢癱瘓「斌仔」鄧紹斌嘅主診醫生、骨科名醫潘德鄰心思思想參選，而○八年落敗嘅何栢良亦有意捲土重來，加上最近怪醫又疑似改變主意想再度參選，掀起三人大混戰局面。
突然傳出參選嘅潘德鄰，現為私人執業嘅骨科專科醫生，最令人津津樂道嘅係佢過去幾年不辭勞苦遠赴四川地震災區做義工，除咗為傷者覆診及做手術外，仲隨身帶備一副古琴，以慰藉傷者心靈。
潘醫生所屬嘅「七君子」選舉委員會名單，連同佢在內共有六人喺早前選舉當選，所以會有一批堅實嘅支持者。我哋問過潘醫生係咪參選，佢就話仲未決定，先要睇定啲個形勢。
怪醫貼錢為行家出頭
至於喺公立醫院做咗逾廿年醫生嘅何栢良，最近就喺社交網站facebook留言，話有好多人問佢參唔參選，佢話呢個階段唔能夠證實，亦唔能夠否認，唔證實又唔代表唔否認等等，總之就講得好「玄」，莫非佢又係評估緊勝算？正當有傳潘德鄰同何栢良有意參選之際，近日又傳出怪醫考慮競逐連任，佢現正製作任內工作報告，被問到係咪參選，佢就話仲要考慮多兩個星期先至決定。
怪醫最近貼錢為百幾個公立醫院醫生追討假期補償，佢攞到筆賠償都唔夠畀律師費，咁有義氣為行家出頭，睇嚟會感動唔少醫生繼續撐佢，據聞西環亦「唔反對」佢再參選，相信有一定贏面。至於曾經盛傳因為要部署立法會選舉，而放棄參選醫學會會長嘅醫學界選委票王蔡堅，已講明唔參選立法會，咁醫學會最終會支持邊個參選呢？睇嚟要到下周三選舉提名期開始後，選情先至會明朗化。