中環出更：林存湄改名增正能量
一個好名，對心理可以有好大影響。本身做註冊臨床心理學家嘅菁英會成員林存湄（Agnes），近日改名為林玥彤（Candice），原來佢從小就唔多鍾意自己個名，每次親友叫佢個名就覺得周身唔自在，於是決心改名。Candice同玥彤兩個名，都係帶有陽光與朝氣嘅意思，佢話希望可以帶來正能量。
關注家長情緒控制
Candice嘅工作係幫助情緒病人克服心理障礙，所以佢都好留意有關心理學嘅研究報告。話說前排佢睇到香港大學做咗個研究，將兩碗飯分別放喺兩間房，一碗就接受良好評價，另一碗就接受負面評價，結果前者顏色變得好鮮艷，後者就發晒霉。結果顯示，負面說話係會帶來壞影響，碗飯就話發霉啫，但一個活生生嘅人會變成點，大家可想而知。
身為滌心情緒健康專科創辦人嘅Candice，仲特別關注家長情緒，唔少兒童出現情緒病，皆因父母本身嘅情緒控制及管教方式出現問題。佢話，如果父母成日打鬧小朋友，會令佢哋發放負能量，所以應該適度地鼓勵子女，多講正面說話，相信可減少兒童嘅情緒問題。