中環出更：王國強豪語 撐梁班子
廣東社團總會尋日喺灣仔會展舉行創會十六周年晚會，特首梁振英（CY）及政務司司長林鄭月娥率領多名局長撐場，以總會主席王國強（KK）為首嘅廣東幫亦空群而出，場面既墟冚又熱鬧。
新政府上場未夠兩星期已政事紛擾，KK都睇唔過眼，致詞時公開表態全力支持CY落實施政理念，甚至發下豪語，若特區政府需要幫手，總會「要人有人，要錢有錢」，博得滿堂喝采。
尋日酒會原本好開心，但係唔少人交頭接耳，面色凝重，事關發展局局長麥齊光落台，令人擔心新政府施政舉步維艱。卓妮問新世界集團主席鄭家純（純官）點睇，佢直斥事件係小題大作，話「人邊有完人吖？擺明係雞蛋裏挑骨頭！」仲話社會和諧十分重要，否則最大嘅受害者係香港市民，而佢都只係一名普通市民咋！
捲入爭產官司嘅已故全國政協副主席霍英東兒子霍震宇亦現身，佢神情自若。卓妮問佢爭產官司有無影響兄弟之間感情，佢無直接回答，只係話：「有啲唔同嘅工作，要搞清楚佢。」
霍震宇未收啟剛喜帖
咁大哥霍震霆嘅兒子霍啟剛快將結婚，有無派帖畀佢？佢話唔知開始派帖未，但佢就未收到。至於有傳霍英東嘅遺囑要求廿年內不分家，震宇就回應話，遺囑執行人有自由度決定。
卓妮