政情：袁彌明慢必緋聞谷人氣
立法會新界東地方選區因議席增加至九席，惹來各方勢力虎視眈眈，初步估算至少有十六張名單，當中單是泛民主派已有八張，其中有人唔知有意定無意為人民力量籌謀，疑似緋聞成日喺政圈流傳，另一方面又大賣各類廣告谷人氣，認真揼本。
人民力量因立法會「拉布戰」聲勢一時無兩，連帶對九月立法會選舉都雄心壯志，其中被寄予厚望嘅袁彌明同陳志全（慢必），首度聯袂拍住上參選，一同出席活動時啲衫同顏色都襯過，據聞有泛民主派中人都問過佢哋係咪結婚，呢啲緋聞當然得啖笑，但對於鍾意睇八卦新聞嘅選民有一定市場。
不過始終選舉靠嘅係真本事，據聞人民力量都有一套完整疑似提升候選人知名度嘅策略，指定動作當然係賣交通工具嘅車身廣告，不過有時有錢都未必可以「心想事成」，盛傳好大機會參選港島嘅人民力量主席劉嘉鴻爆料話，東區嘅小巴車身廣告位，已經畀建制派買晒喇。